現今右左腳雙槍將難求

據英國足球雜誌《442》調查顯示，歐洲五大聯賽的雙槍將平均薪酬高過得一隻腳熟練嘅球員14至15%，荷蘭中場指揮官史奈達之前喺國際米蘭周薪高達26萬鎊，叫價勁高。雙槍將供不應求有價有市，不過新一代球員只用一隻腳都勁高薪酬，此球壇風氣搞到個個懶得練波，使現今球壇愈來愈少球員可以左右開弓，唔希望雙槍將會絕種一天！
英國足球雜誌《442》早前發表特別調查，喺歐洲五大聯賽之中，左右腳都係咁勁嘅球員週薪特別高，比起慣用「單腳」的球買足足高出14至15％，反映呢類球員特別吃香。史奈達効力國米時期周薪高達26萬鎊，佢今年冬季轉會窗死都唔肯減薪去利物浦，撐到咁行全因佢左、右腳傳射皆能，係市場罕有正貨。阿仙奴教頭雲格向來慳家，季前肯用1,500萬鎊引入西班牙球星辛迪卡索拉，正正係睇中佢兩隻腳都掂：「我其實唔知佢邊隻腳純熟啲，佢係右腳仔，但根本分唔到邊隻腳勁啲。」

世上無難事，「單腳」球員若想升呢成為慣用「右左腳」的雙槍將，只要透過練習就可提升逆足精度（較弱嗰隻腳嘅能力），無奈家陣啲球員人工高福利好，英超兵閒閒哋周薪都過百萬港元，懶得練習慘變生蟲腳，搞到球壇愈來愈少優質雙槍將。曼聯青訓之父艾歷夏里遜睇唔過眼：「講真，我唔知點解英超大部分球員都唔能夠左右開弓，我教『紅魔鬼』嗰陣一定要球員兩隻腳都踢到波，咁先學到嘢嘛！」英格蘭傳奇雙槍王華度都加把口：「要練好隻生蟲腳，每日拎多廿分鐘就得，咁都要慳？」
足球史上曾經有過無數傳奇雙槍將，近年最勁嗰個梗係烏拉圭射手科蘭啦，佢直言自己進入咗化境：「我覺得自己係真正雙槍將，兩隻腳能力一樣，無分高低。」新一代球員當中，比利時進攻中場夏薩特稍為叻啲身價已達3,000萬鎊，曼聯日本中場香川真司兩隻腳傳得射得，祖雲達斯新進法國中場保羅普巴左右腳射波都勁，算係唔錯。

球王多數得右腳

能夠擅用左右腳踢波當然有着數，特別係技術要求較高嘅中前場球員。但最諷刺係唔少球王都係右腳王，比如普斯卡斯等，佢哋都係一腳走天下，好少見佢哋用兩隻同時踢波。其實左右開弓只可當係一項特殊技能，唔代表你可學似傑斯，馬納當拿咁一個扭幾個。再講要成為雙槍將大多數都係從細開始練習，事關當肌肉骨骼完全發育後，要練到左右協調就要付出更多時間，真係練得嚟都退休。所以現今足球員只會集中鍛煉體能及速度，好少會花太多時間去練到左右腳可純熟運用。唔敢講鍛煉兩邊腳係不切實際，但練好基本功就更加重要。