以下係我早兩日係 Facebook post 既原文,事後因為橫額物主曾經留言認為我誤解佢(只係曾經,因為留言而家失左蹤),但又無解釋清楚到底我點樣誤解佢,所以最後我想再寫多少少強調返我原文既意思,同埋放上 Fanpiece 可以等更多人知多啲。
相片來源: Ultras Bluewave - 藍浪打氣團 Facebook Page
引用首先恭喜傑志贏得聯賽冠軍~賽後睇下東傑大戰既相時,發現傑志球迷有一支寫住 Kitchee Casuals 既橫額。Casuals 呢個字,你可能會以潮流角度解做輕便裝之類既意思。係足球界,你都可以以時尚潮流既角度去解既.... 但我要先講,係足球界,Casuals 係同足球流氓 (hooligans) 掛勾架。
足球流氓又係咩黎呢?大家對 Ultras 可能有啲認識,Hooligans 同 Ultras 係完全兩回事黎。 Ultras 係一班人入場唱歌打氣支持球隊,hooligans 好日唔入球場,一入球場就係去搞事,可以係衝去對方球迷區打人,可以係拆人地個球場,又可以衝落去球迷擾亂球賽。點解條橫額中間條友要遮住個樣呢?因為流氓都驚比警察拉架... 比人影到自己個樣抽後算賬就有手尾跟!
當年英國流氓風氣盛行,球迷係場內成日以暴力攻擊對方球迷甚至球員及球證,班流氓之後為左唔好比警察睇唔出佢地想搞事,興起左流氓扮高尚既潮流。流氓會買貴價潮牌著上身,咁佢地就可以混入敵對球迷之中搞事。呢啲著潮牌既流氓後來被稱為 Casuals 。
直至近年,Casuals 已經進化成好多球迷最愛既 fashion style。唔少球迷都會買潮牌著去睇波,呢啲潮牌包括唔少得Adidas、Nike、 New Balance,仲有 Fred Perry、 Stone Island 等等。有唔少球迷都會用 #casual 黎 share 佢地去著咩衫去睇波。之不過!!!雖然 casuals 已經被好多球迷當潮流,但唔代表呢個已經變成同流氓無關。係歐洲好多地方仍然有流氓組織(淨係德國都見唔少),但我真係未見過有人會整橫額大大隻字話比人知呢度有 hools 或者 Casuals囉。
你可能會問香港邊有流氓,呢個問題我都無答案(可能傑志球迷真係第一班流氓),所以我真係好好奇想知到底傑志既球迷知唔知佢地呢條橫額點解。唔知既話,咁我建議不如睇多啲關於球迷文化既資料先;知道的話,我又想問係咪真係想走流氓路線?雖然近幾場波有傑志球迷特登走去人地果區度想搞事,但呢啲最多叫搞屎棍咋喎。真係要做流氓既話要去打交架,要比警察追架,香港人玩得起咩?
比人笑係小事,但叫得自己做 Casuals 既話就小心出事。唔知會唔會有一日有幾個流氓黎香港睇波,見到你自稱 Casuals,隨時走黎搵你搞事。可能有幾位球迷真係想做 Casuals(但我又唔見佢地著潮牌),咁我建議佢地最好離開只係想唱歌打氣支持球隊既球迷遠啲,佢地比人點錯相邊個負責?
可能只得我一個會 care 呢一隻字... 大家只會得啖笑。我講呢條橫額只係想大家可以對球迷文化有多啲認識,見到香港有人想推廣球迷文化真係一件好事黎。而家算係慢慢開始多人留意時,我唔想因為有人無知而惹事,最後又搞到其他人怕左球迷。
我要強調我唔係想指傑志球迷(或者只係 Kitchee Casuals 既成員)係流氓,亦都對傑志球迷無任何偏見。我成篇文都係想問傑志球迷知唔知 Casuals 點解,呢個字既來源,呢個字既變化,呢個字現時既意思,其他人會點解理解呢個字,呢啲都係一個好重要既問題。文中我提到「唔知既話,咁我建議不如睇多啲關於球迷文化既資料先;知道的話,我又想問係咪真係想走流氓路線?」
我問係咪真係想走流氓路線,係因為我知道 Casuals 呢個字唔只係解作橫額物主所講既「著潮牌去睇波」咁簡單。無錯,好多歐洲球迷現時都中意著啲「球迷專屬牌子」去睇波,等人覺得佢地唔係普通球迷,但唔代表呢隻字唔係沿自英國流氓,唔係你自己話只係解作「著潮牌去睇波」,人地就唔當你同流氓主義無關。老實講,我自己都唔覺得香港會有足球流氓囉,但最基本既球迷文化都未建立好,又做乜要用呢隻字去扮型呢?
傑志下季會出戰亞冠,你帶埋枝旗去作客的話,如果人地當地真係有流氓,人地會知你用 Casuals 呢隻字改名意思背後,只係為左話比人知你中意著潮牌去睇波?再加上,橫額上面有個男人包哂頭咁,唔係有「想搞事」既成份係入面,咁點解要隱藏身份?
大球場道同香港力量多年前已經開始推廣球迷文化但一直都無咩迴響,呢兩年因為世界盃外圍賽,大家開始想聚集更多球迷一直為自己既球隊打氣,呢樣真係一件好事黎。但大家要記住,一個文化係要慢慢建立,唔係今日你召集到一百人,明天呢一百人就可以一齊打氣。如果一開始無香港力量人少少咁為香港打氣,你估去到世盃外會邊個可以聚集到聲音?當時無香港力量的話可能全場都只係拎住 Bom Bom 捧咋。去到近年開始有更多球迷自稱 Ultras,學習外國球迷既打氣文化,越來越多人想出一份力,呢個的確係一個正面既轉變,但照抄人地既打氣文化前,必須要認識人地文化既背景同來源。
我一開始寫呢篇野係因為我知道好多香港人對球迷文化無特別認識,唔想佢地因為有一個人出現,而佢睇落好似識好多野就盲目認為佢講同做既野就係岩。我唔想香港球迷被輸入一啲錯誤既訊息然後懵然不知。老實講,同橫額物主辯論完後,得出既結論就係... 佢識啲乜?
我又識啲乜?我當然唔係專家啦,但我就係因為對球迷文化有興趣所以先走左去德國周圍睇波學野,當中認識左唔同球隊既球迷,唔同球迷對唔同地區既文化都有唔同認識,所以想將我見識到既野同大家分享下。如果有人可以指證我既錯誤,我真係會好開心,因為係香港真係無咩人可以同我傾球迷文化...
Grenzenlos Groundhopping