Coach Kim (still) has a lot to answer.

場邊筆記 於 07/09/2017 發表
http://www.hkfa.com/upload/newsimage/news/2017/20170905/20170905a.JPG
亞冠盃分組賽同埋亞洲盃決賽周嘅資格,隨住辛祖臨完場嘅十二碼加補中都射失,都應該凍過水。但係與其剩係怪責辛祖呢球十二碼,倒不如認認真真,睇返香港隊有啲咩問題,雖然嚟嚟去去啲問題都係差唔多。

第一,金判坤你又排怪陣啦。

先唔講3-4-3,講用人。放陳肇麒喺後面較炮都算,但係點解辛祖上半場都要墮後埋一份呢?不論喺傑志定係香港隊,朱志光同金判坤都先後做過呢個試驗,而事實證明辛祖最有威脅嘅,係喺前線自己攻,或者做一啲二傳嘅工作。下半場果斷換人,用返黃威做串連,由辛祖同艾力士攻堅,前場進攻嘅效果已經好好多,咁金判坤你又何苦玩人半場呢?

第二,其實照抄三後衛係咪有用呢?

傑志踢三後衛點解有效果,係因為啲人腳啱用:金奉珍、丹尼、唐建文都係用波唔差嘅後衛,兩邊嘅林志堅、費蘭度呢啲都係活動範圍廣,而且突破同助攻能力上乘嘅球員。但係香港隊呢?由4-2-3-1轉做3-4-3,除咗有基藍馬嘅俾波等大家觸目驚心之外,兩邊翼衛支援嘅效果其實都麻麻地:麥基控球嘅問題好多時反而拖慢咗反擊嘅節奏,直到下半場有空位跑先發揮到作用;積施利就攻守兩邊都患得患失,進攻上支援唔夠,防守上都有失位嘅情況出現。

更大嘅問題,就係踢多個後衛之下,連中場嘅控制力都有所減弱:林嘉緯喺中場派牌,但係一來狀態麻麻,傳送略欠準繩;二來防守上都係球隊嘅弱點,冇咗以往嘅雙防中,就剩係靠黃洋負責掃蕩嘅工作,中場嘅控制能力結果反而不及以往。

第三,對住同級或者較弱嘅對手,港隊都仲係未有足夠嘅進攻板斧。

馬來西亞都叫做同香港差唔多級數,但係港隊似乎都係冇乜進攻板斧拎到出嚟,大致上都係靠反擊、死球,同埋黃威下半場啲直線去製造機會。金判坤重執港隊教鞭,大大話話都有五年,除咗防守叫做見得吓人之外,進攻組織嘅問題都已經講咗好耐。如今對住星馬呢啲同級嘅球隊都無計可施,甚至對手嘅組織都優勝過自己嘅時候,真係好難怪有球迷會嗌Kim out。你唔攝高床板諗吓,都唔該搵個進攻戰術好啲嘅助教,等個教練團幫手啦。

https://www.upower.com.hk/wp-content/uploads/sport/2017/07/20170725_U22%E6%B8%AF%E8%B6%B3_%E9%87%91%E5%88%A4%E5%9D%A43-e1500977207632.jpg
痛失兩分,出線形勢直插谷底,不過比賽都仲係要打。下兩個國際賽檔期,將會直接決定港隊仲有冇機會晉身亞洲盃決賽周,唔該金判坤認認真真諗吓,點樣解決呢啲嘅問題啦,好嗎?