維度爾天神降臨 迪維斯連續三場入波 祖記兩星期內8球射爆拉素

黑白意甲 於 03/09/2013 發表 收藏文章
一場令人振奮既球賽,估唔到兩星期前4-0橫掃拉素,今場又轟多4球!一場作客、一場主場,實實在在證明兩隊球隊既實力差距。
祖記同一招式三度破門 拉素遠射還擊

今場波祖記仍然維持高節奏,原用上兩場既正選11人,中前場既組織比之前默契。中場三人今場的站位拉得比較開,普巴很多時走到左邊路活動,同艾沙莫亞輪流衝擊拉素右路,但效果並不明顯,反而令中路多咗空檔被拉素多次起腳遠射,所失既一球就係由靴蘭尼斯中路遠射令保方甩手再由高路斯補中,全場拉素都有多次係中路禁區頂遠射。而呢個入球就睇到高路斯作為一個射手既射門觸角,亦係佢第一次射破祖記大門。
祖記既進攻仍以中路較有威脅,除咗地面傳送之外,更多次從中路吊波入禁區,令進攻更立體同直接,睇返今季三場波,明顯祖記既進攻比以往靈活。而今場維度爾就變成恩沙基既化身,連續兩次反越位成功入球,兩個入球同出一轍。過去兩季我地已經見識過維度爾既後上能力,呢兩球更加好似一個前鋒殺手一樣,由反越位入契接應到起腳都非常流暢而冷靜,上季成為球隊首席射手,今季佢仍然會係祖記一大殺著。順帶一提,維度爾入第二球時,拉素其實有中場簡迪華受傷出場治理,當時拉素係場上只得10人應戰,而祖記亦把握到呢短短幾分鐘既人數優勢而入波。

呢種直接既打法似乎係干地完全睇通咗拉素兩個中後衛轉身慢既弱點而刻意制定既戰術,可惜拉素完全無計可施,到下半場胡仙歷既入球亦都係同一模式,睇黎拉素要諗辦法解決呢個死穴。
迪維斯趕上巴治奥
另外不得不提既當然係一加盟就連續三場入波既迪維斯,上一次能夠一加盟祖記就連續三場入波既球員就係巴治奥,已經係超過廿年前既紀錄。可以睇得出迪維斯開季既狀態非常出色,呢場波既入球雖然只係錦上添花,但整場波當中佢係前場既威脅好大,多次被侵犯,入波前亦有一球射中柱,而佢同隊友既短傳配合越見默契,佢既個人突破能力令對手防不勝防,其中最精采既一次係前場右路禁區頂,佢接球後轉身推左走右過人入禁區,無論腳法速度技術都一流。

下半場既戰情同上半場相差不遠,拉素仍然只能靠遠射去威脅保方既大門,而普巴係下半場多返係中路活動同攔截,加上胡仙歷入波之後,拉素既反擊力同氣勢就更加減弱。
睇返今場祖記比之前兩場係進步當中,球隊組織流暢咗,但係兩隻翼今場相對失色,中場既防守亦需要繼續改善。


黑白之星
維度爾

標籤: 祖雲達斯  意甲  拉素  維度爾  迪維斯  意大利  

留言


請按此登錄後留言。未成為會員? 立即註冊
    快捷鍵:←
    快捷鍵:→